MULING TUTUNOG ANG AGUNYAS

MULING TUTUNOG ANG AGUNYAS

Hikbi nila't iyak nalikha'y hagulgol;
Habang hinigit mo ang huling hininga.
Ah, tapos na pala ang buhay na ukol.
At naglakbay akong may butil ng luha.

Nais kong hilahin pabalik ang oras
Noong may lakas pa't ngiti't katabilan.
Ang mga habiling di naipatupad
Ay dumadagundong nyaring kamalayan.

Nais kong lingunin ang mga nagdaan.
Noong ako'y lagi mo pang hinahanap;
Tuwina't malala ang 'yong karamdaman.
Nguni't di ko pala kaya ang magpanggap.

Tulad ni Mariang sa kanyang kandungan;
Si Jesus na anak, mundo ay nilisan.